政壇：林奮強放生《蘋果》太軟弱

唔少網民都話政府軟弱，今次又再次證實呢句說話可能冇錯。話說休假中嘅行會成員林奮強上星期被《蘋果日報》頭版報道誣衊佢「歧視新移民」。林奮強事後主動向記者否認呢件事同播出錄音澄清，令有關方面無論點都要道歉。有指林奮強考慮告《蘋果》，但反反覆覆，佢終於決定唔告《蘋果》誹謗。

林奮強尋日透過電郵回應傳媒查詢，話對於《蘋果》解釋報道錯誤係由於記者聽錯嘅說法，難以相信，因為佢發言當日在場有一百多人，都冇一人將呢個訊息傳出去。會後兩日，再有記者問佢係咪歧視新移民，佢再次否認。不過最後出街嘅報道標題仍為「林奮強：歧視新移民」。

林奮強又嚟一輪訓話，話希望大家反思香港嘅核心價值，因為銷量同新聞轟動性唔應該係香港報章凌駕一切嘅銷售目標等等。林奮強用咗篇超過一千三百字嘅電郵講大道理，但就連強硬少少嘅譴責性用詞都冇，最後仲決定唔作法律追究，真係好難怪畀人話軟弱囉。特區政府嘅人咁好蝦，以後人哋再亂咁寫都唔使驚啦，寫錯咗就講「對唔住囉」，都冇懲罰嘅！