政壇：財爺小小超飯局惹疑竇

近日忙於撰寫財政預算案嘅財爺鬍鬚曾，照計應該忙到一頭煙，佢早排都自爆話返到屋企都要加班。點知佢前日就畀人發現同電訊盈科主席「小小超」李澤楷食飯，奇就奇在小小超旗下嘅兩間傳媒機構都對特區政府唔多友善，但係佢哋食飯食得咁開心，係乜嘢邏輯相信外人都好難明白。

鬍鬚曾畀人撞見同小小超喺鯉魚門歎海鮮、飲紅酒，同場仲有前環境運輸及工務局局長廖秀冬等人，小小超就話飯局無講政治議題，只係食飯敍舊。鬍鬚曾位居特區政府第三把交椅，小小超則擁有一間報館同一個電視台，但又不時同政府抬槓，兩人見面，唔通預算案要特別諮詢小小超意見？抑或小小超有建議要同鬍鬚曾當面提出？定係有其他嘢傾？有時表面睇到嘅同內裏係完全兩回事嚟。

既然世事好多時表裏不一，人同人嘅關係又好難睇得透，曾經係貪曾愛將嘅鬍鬚曾嘅預算案為咗博掌聲，會唔會再亂派錢都好難講。鬍鬚曾喺下個月二十七號會為第四屆特區政府宣讀第一份預算案，大家拭目以待喇！