政壇：立會新招免流會

立法會內嘅大懶蟲眾多，開會遲到缺席者大有人在，成日都搞到流會收場。唔知係咪要遷就呢班大懶蟲，立會秘書處最近就有新招數。

香港警方一向設有「不反對通知書」制度，以防突然間有大批示威者上街令警方失晒預算。其實立會秘書處亦一直設有「議員離港通知書」，供議員申報幾時會離港同返港，以便秘書處安排會議同預算出席人數，但由於議員或佢哋嘅助理要書面填表，再親身交番畀秘書處，好多人都怕麻煩而冇申報。

陳維安首項德政

為咗解決問題，秘書處將個通知書系統升級到電子化，喺內聯網嘅活動編排系統新增一項功能，畀議員喺網上填寫暫時離港記錄，仲可以登記埋有邊啲會佢會開到，邊啲會會趕唔切出席，一CLICK就搞掂晒。呢個安排算係秘書處陳維安上任幾個月嚟首項德政，一來可以環保慳紙，二來鼓勵更多議員自動申報，自然就減低因出席人數不足而流會嘅機會。

陳維安當然想用呢招做好把關嘅工作，之不過就算申報制度電子化，都未必令立法會內班大懶蟲「勤力化」，因為填表制度並非強制性，對嗰啲向來都冇交代同「電腦盲」嘅議員，依舊未必會主動申報，令秘書處大失預算。其實秘書處做啲乜嘢，都應該改變唔到啲議員缺席或遲到嘅做法，反而市民就有方法喇，佢哋可以用選票踢走班大懶蟲，幫立會換血。