小一學額爭崩頭 雙非遺禍何時休

香港最鍾意自認乜乜中心、物物之都，可惜多數係吹水，只有一樣嘢當之無愧，就係「排隊之都」嘞。買奶粉又好，申請居屋又好，或者申請小一學額又好，統統打晒蛇餅，唔到你唔服。

呢，新學年嘅小一統一派位尋日交表，上水區派位中心晨咁早就有大批家長帶埋小朋友排隊，人龍見首不見尾。有雙非家長話到明要為本港出世嘅子女爭取「平等對待」；而唔少本地家長就擔心學額不足，小朋友要山長水遠跨區返學；更有家長狠批曾蔭權爵士任內冇及時解決雙非問題，反而不斷殺校，搞到要「幫細女搶奶粉，幫大女搶學位」。

其實，呢啲排隊嘅場面唔係今年至出現，近年跨境返學嘅雙非學童急升，北區早就淪為重災區。嗱，新學年上水有六百幾個小一學額，而申請學童就有一千七百個，雖然由鄰區借調咗部分學額，始終仲差近千個。喺僧多粥少嘅情況下，學校唔只要每班加人，有啲學校甚至要將電腦室改為課室，你話唔影響教學質素就假。

愈來愈多雙非兒童回流香港讀書，導致教育資源嚴重短缺，市民怨聲載道，當局又有乜嘢辦法解決呢？港產官僚話喎，社會已感受到呢方面嘅壓力，人口督導委員會將會研究。喂，家陣已經水浸眼眉喇，究竟仲要研究到幾時吖？

咪話太一叮唔提醒，內地針對雙非兒童佔用資源，舊年起已禁止官立中小學接受港澳籍學童，就讀私立學校嘅港澳小朋友亦唔可以攞津貼。即係話，日後來港就讀嘅雙非學童肯定愈來愈多，對學校造成嘅壓力一定愈來愈大，當局再唔盡快諗辦法解決問題，好快就爆煲嘅喇。

講嚟講去，都係前朝貪曾政府禍港殃民，多年來對雙非孕婦來者不拒，搞到七國咁亂。雖然梁振英上場前即時叫停，但為時已晚，十年來累積嘅雙非兒童已經有廿萬，就算按當局嘅預測一半回流，都有十萬咁多，問你點算。再講，呢個數只係斷估咋，隨時唔只一半雙非兒童湧落嚟，政府完全處於被動，只能頭痛醫頭，腳痛醫腳。

所以話，雙非問題再拖落去，遲早拖冧香港。依家叫停咗，但問題仲未解決o架，一日唔從法律上根治，一日就留低條尾巴，一日就消除唔到亂象，今日就話爭學額啫，聽日可能就要爭房屋、爭福利嘅喇，叮！