SUN搞作：少膽虫手記：創作集思會揭秘

特登聽唔到林奮強個「唔」字之後，身為《爛果》老腫嘅少膽虫沉寂咗一排，好耐都無（面）見大家啦，但咪以為少膽虫反省自己作新聞，要面壁思過喎。少膽虫向來深信，對付一份爛報紙嘅方法，並唔係去反抗佢，而係幫手做爛佢。家陣《爛果》愈做愈爛，少膽虫自覺都算為社會出番一分力。

講番《爛果》嘅編輯部，近排人人死氣沉沉就一定o架喇，之但係淫賤黎、肥豪同埋少膽虫不可告人嘅三角關係，就愈來愈激情。鬼咩，學啞視話齋，盛生同女性朋友嘅正常社交，畀我哋「編排成打情罵俏，當街打罵調笑」，你估真係只係靠想像力作嘅咩？其來有自呀！

嗰日，淫賤黎親自開創作集思會，少膽虫就報告咗盛生呢單料。淫賤黎一聽，就皺眉話：「自古姣婆遇上……吖，係才子配佳人先啱，盛生食……食……食嘢太正常喇，點寫個好古仔出嚟先？」大家無聲出之際，肥豪妖聲妖氣咁話：「係咯！老腫唔把好關，先至會有啲咁普通嘅料嚟！」少膽虫心諗咁你都入到我數？你真係當份《爛果》係我一個人做晒咩？

不過，少膽虫好冷靜咁回應：「我同我嘅團隊會加大力度推進新聞創作產業嘅發展，題材上要做多做闊，相片要『色』度有為，依家未夠色！」

淫賤黎一聲不響，肥豪卻搶住話：「你仲有誠信可言咩？嗰次你幫神經漢執相，加深啲瘀色，出咗街畀人鬧，你竟然縮沙；今次聽漏個『唔』字，你又道歉！你到底撐唔撐《爛果》嘅偉大路線？」

少膽虫了然於胸，原來係逼宮！少膽虫大義澟然，指住肥豪鬧：「做人做虫都好，係唔係要去到咁盡先？你有老婆又有個女o架，係咪要搞啲咁嘅嘢先？有報應o架！」肥豪立即反擊：「你講還講，唔好拎我屋企人出嚟！」

淫賤黎此時終於出聲：「唔好嘈喇，你哋都係我愛將。」淫賤黎眼眸中放出無限憐惜之意，「我哋三個一齊咗咁耐，用咗咁多時間，咁多方位，咁辛苦咁磨合，唔好嗌交喇。」

少膽虫聽完想作嘔，但想起自己要做爛《爛果》嘅偉大使命，勉為其難咁扮感動，向肥豪道歉之後，仲建議：「不如將我哋嘅三角關係套落盛生度，一定會寫得好好睇！」只見淫賤黎開心到見牙唔見眼，問：「咁我咁風流倜儻，係唔係即係盛生？」