SUN奇古怪：Sun潮語：【老Seafood】

香港以前係一個漁港，時至今日香港嘅海鮮依然享譽世界，我敢講，香港人煮海鮮肯定係全國第一。外國人嚟到香港其中一個必到景點，就係去香港仔嘅海鮮舫歎seafood。然而，潮語「老seafood」則同海鮮完全無關，「老seafood」只能宣之於口，並唔能夠食落口。

潮語「老seafood」嘅意思即係「老屎忽」，「seafood」個音同「屎忽」差唔多。好多人喺公眾場合唔想講得太露骨，所以就用「seafood」去代替「屎忽」。

「老seafood」就係話嗰啲，喺各大機構恃住自己做得耐、年資長，經常恃老賣老，美其名係教育後輩，實質係經常話當年，但喺後生仔眼中，就係阻住個地球轉嘅「老屎忽」。「屎忽」，即係粵語所謂嘅臀部，咁點解呢種人要用臀部而唔用其他器官去代表？其中一個原因係因為呢類人，長期用屎忽「坐」喺公司一啲較高層位置。另一個說法係呢類「老seafood」，因為年紀較大、年資較長，所以熟識公司大部分賤招及辦公室政治嘅玩法，容易設陷阱加害其他同事，非常「屎忽鬼」。所以，老咗嘅屎忽鬼就稱為「老seafood」。

「老seafood」近年有年輕化趨勢，好多三十零歲甚至未夠三十，就已經老氣橫秋，十足老屎忽。因為只要你喺一間公司或一行做得十年八年，爬到一定位置，生活變得舒服，你就會易變得因循守舊，不思進取，表現愈嚟愈無以前咁好，即係所謂「回塘」。呢個時候，有啲人就會用其他手段去保住自己嘅權位，甚至去到損人利己嘅地步，唔覺唔覺就做咗一位「老屎忽」。

長江後浪推前浪，呢個係永恒嘅定律，年資老又不思進取做唔到嘢，當然要被淘汰。好似有啲民主派「老seafood」爭取民主廿九幾年，只爭取到最新施政報內講政制改革嗰百零字，不如讓啲位出嚟畀啲有心嘅後生仔，為香港民主發展做多啲嘢好過啦！