政壇：搞搞政：廖長江撐長毛反討無趣

立法會內建制同泛民議員議政時壁壘分明，私底下卻各有交情。社民連立法會議員梁國雄（長毛）喺大圍新翠邨嘅議員辦事處尋日開幕，一班泛民主派新界東議員都有捧場，唯獨唔見白鴿黨主席劉慧卿，當中仲有一個來客連長毛都估唔到，佢就係建制派議員、中華總商會代表廖長江（Martin）嘞！不過，Martin盛意拳拳，長毛卻唔多上心，致辭時竟然兩度將廖長江叫咗做「范長江」，真係失禮。

Martin尋日要喺立法會開會，都特登抽時間趕去賀長毛，佢話雖然大家政見唔同，但都係同事一場，議員辦事處開張好應該祝賀吓咁話。

辦事處開張係開心事，但長毛尋日就忽然感慨，回想同四五行動古思堯一齊喺荔枝角收押所嘅日子，又慨嘆自己今屆立法會都唔知做唔做到四年咁耐。我哋問長毛點解咁樣講，佢就提起最近因為住公屋而被資產審查嗰單嘢，仲話︰「春江水暖鴨先知呀！」莫非佢暗示緊正被人調查？