政壇：媽打娶新抱猛人到賀

前民政事務局常秘李麗娟（媽打）任職會計師嘅囝囝劉堃（Chris）尋日小登科，同拍拖六年幾嘅律師女友蘇雯華（Miranda）共諧連理，喺灣仔會展筵開七十二圍大宴親朋。媽打人面廣，高官、政界同商界好多嘉賓出席，香港大學校務委員會主席梁智鴻（金刀梁）更獻出人生「第一次」做見證人，而監禮人就由基本法委員會副主任梁愛詩擔任，二人生日只差一天，名副其實「梁twins」！金刀梁嘅溫馨提示以城中焦點話題作引，佢話知道新郎哥平時工作好忙，唔記得僭建，都唔好忘記結婚紀念日，婚後要繼續支持太太發展事業。

前財爺梁錦松「借出」兩子一女做花仔花女，一身紫色旗袍配水貂披肩嘅媽打則滿場飛招呼親友。新郎Chris一身間條禮服，新娘Miranda就穿上七萬元嘅Vera Wang婚紗，仲戴住價值不菲嘅鑽石頸鏈，幸福滿溢。一對新人深情對唱《Endless Love》，又承諾會盡快生番個蛇B，等媽打湊吓孫喎！