政壇：避過立會拉布 金發局橫空出世

新一份施政報告宣布成立金融發展局，但新架構係以有限公司嘅模式組成，一個咁重量級嘅機構用咁嘅模式誕生，外界質疑多多，其中一個就係金發局擺明要繞過立法會面世。立法會主席曾鈺成尋日出席一個活動時都話，政府可能係驚提交立法會審議時會引發長期爭議。呢句話嘅意思係，由史美倫領軍嘅金發局如果用法定組織嘅方式提交立法會，泛民好可能就應否成立、功能為何、甚至編制開支展開一場拉布戰，為免再次夜長夢多，避「布」而行就舒服晒。

阿曾尋日出席個電台節目時，被問到點睇金發局咁樣橫空出世。佢話，由政府成立嘅組織、但唔經立法會審議，以前都試過，今次絕唔係第一次。佢認為即使金發局唔經立法會，但絕唔代表毋須公眾監督喎。

學生論政前要做好功課

講開早前喺議會爆發嘅拉布戰，阿曾都畀一個學生翻舊帳，話佢當年都試過拉布。佢促請呢個學生睇清楚當年嘅事件背景，強調自己當年只係發言十五分鐘，同今時今日長毛拉布時嘅冗長發言冇得比。

阿曾又話依家愈嚟愈多青年不滿政府施政，但佢即場反問有幾多學生認真睇過新一份施政報告﹖跟住語重心長咁勉勵學生，評論時事前先「做好學問」、鞏固文化知識，以及睇完成份施政報告，咁鬧人先有說服力喎！