紅加東減彈舊調 數字遊戲何時了

大家知唔知乜嘢叫舊調重彈？梁振英首份施政報告提出以「紅加東減」平衡過海隧道車流量，咪就係舊調重彈囉。

係人都知，本港三條過海隧道車流量極不平均，東隧收費太貴車流稀疏，西隧「食人隻車」更加拍晒烏蠅，結果紅隧長期大塞車，唔止駕駛人士怨聲載道，而且經常搞到全港交通亂晒大龍，增加社會成本。各界多年來要求當局盡快諗辦法解決，例如回購東、西隧，點知歷屆政府詐傻扮懵，一拖再拖。

好嘞，新一屆政府上場，大家以為有計喇，點知又係大失所望，「穩中求變」變成「穩中不變」。施政報告提出紅隧加價，東隧減價，至於西隧點樣解決，連提都冇提。正如有立法會議員質疑，「紅加東減」擺明用公帑補貼東隧，好唔合理啫。當局點解釋呢？運輸及房屋局局長張炳良話喎，將會就「紅加東減」展開公眾諮詢，了解有乜利弊。

嗱嗱嗱，搞來搞去又係借公眾諮詢過橋，根本冇誠意解決問題。冇錯，家陣紅隧每日車流量大約十二萬架次，東隧係七萬架次，如果將紅隧部分車輛吸引到東隧，此消彼長的確有助紓緩塞車情況。問題係，紅隧加價再補貼東隧減價，等於幫私營隧道打劫納稅人荷包，咁算唔算官商勾結，利益輸送先？

話時話吖，前朝政府一直對回購東西隧建議闊佬懶理，反而用幾百萬請顧問公司搞出呢個「紅加東減」方案，跟住又冇咗下文。何解新一屆政府原汁原味將方案推出？講嚟講去，又係玩拖字訣。

其實，東隧專營權將於二○一六年屆滿，即係仲有三年幾就要交番畀政府，諮詢得嚟都夠鐘喇。呢嗱，張炳良自己爆響口承認，灣仔繞道工程未完成之前，紅隧塞車問題難以解決。喂，灣仔繞道最快二○一七年至通車，就算「紅加東減」成事，隧道照樣塞車，咪即係多此一舉，無事生非？

本來呢，回購東西隧可以標本兼治，一了百了，當局議而不決，決而不行，等到依家東隧專營權就快屆滿，先至重彈「紅加東減」嘅舊調，簡直九唔搭八。咪話太一叮唔提醒吖，如果當局繼續玩呢啲無聊嘅數字遊戲，遲早又係跪低，唔衰攞嚟衰嘅咋，叮！