City Parade：富義代升呢
富二代雲集嘅「百仁基金」，眨眼換屆，早前舉行第四屆董事局就職禮，官商巨賈紛到賀。新任主席李文俊幹勁十足，打正旗號聚焦青年工作，仲帶頭捐出一千萬元，力撐青年發展工作。唔少名人二代都「升呢」做副主席，新人事，新氣象，繼續發揚「百仁」扶助弱勢社群的精神。
同聲同氣
三個「潮州冷」同聲同氣，左起中總會董張俊勇、酒商葉振南及百仁基金副主席廖偉麟。
最佳拍檔
廠商會會長施榮懷（右）同工總主席鍾志平一向合作無間，老友鬼鬼。
暢遊充電
前東華三院主席李三元大仔李曠怡（右）與細仔李仲怡（左），早前暢遊東京充電。
戥友開心
金利來太子爺曾智明（右）加入「百仁」做副主席，中總榮譽會長霍震寰公子霍啟文（左）都戥佢開心。
舉杯同慶
理文造紙太子爺李文俊（中）與廠商會副會長顏吳餘英（左二）同佢嘅公子顏志永（左一）分別榮升百仁基金主席及副主席，行政會議成員林健鋒（右二）與公子林凱章（右一）齊舉杯慶祝。
好友敍舊
「鋼鐵公主」陳寧寧（中）忙於打理家族生意，甚少出席公開活動，前菁英會主席洪為民（右）及東華三院社會服務總主任姚子樑（左）當然爭住同佢傾餐飽。
投資動漫
富豪集團太子女羅寶文，投資超過百萬元大搞動漫產品。
風采不減
久違了嘅九巴金公主伍穎梅風采依然。