政壇：政商定格：曾裕孖契女偷閒音樂遊

「美容天后」曾裕（Joyce）身兼博愛醫院總理，係個大忙人，但日前就見佢同位長髮靚女好滋油咁喺商場閒逛，原來呢位靚女係Joyce老友嘅囡囡彭湘淇（Cory），亦係Joyce嘅契女。

當日兩人特意約埋去行影音店舖，為Cory籌備中嘅唱片搵靈感，佢嘅其中一個行程就係去到英國總部申請破產嘅hmv一間分店，佢哋攞起一隻又一隻唱碟認真睇，Cory仲戴上耳機試聽，停留好耐至離開。Joyce話，Cory又靚又叻女，所以除咗搵佢做旗下美容中心代言人外，仲全力支持佢做歌手。Cory讀緊大學時已兼職做模特兒，拍過唔少廣告及電影，最近決心出碟做歌手，仲跟隨名師學唱歌及跳舞，絕不兒戲。