政壇：搞搞政：區議員尋「失蹤」栢志高

前朝政府經常話要發展地方行政，提升區議會職能，明確要求署長級或以上官員必須出席區議會會議，直接面對地區嘅奇難雜症，可惜好多高官都當係耳邊風，區議員怨聲載道，唔知係咪忍無可忍，油尖旺區議員陳偉強尋日忽發奇招，發尋人啟事，或者應話尋官啟事，矛頭直指房屋署署長栢志高。

呢封尋人啟事批評栢志高一直「深居簡出」，有心迴避區議會。陳偉強聲言代表旺角區海富苑一帶居民尋找栢志高，陳表示海富苑一直有木蝨為患，居民飽受困擾，所以希望署長落區了解，並回應居民嘅訴求，但可惜對方一直音信全無。陳已將有關問題提交本月二十四號區議會轄下委員會討論，並再次邀請栢志高出席會議回應事件。

栢志高唔蒲頭，忙咩呢？或者新政府要急急解決住屋需求，作為署長嘅佢忙於四出搵地起公屋，減低公屋輪候僧多粥少嘅苦況，偏偏油尖旺冇乜土地提供，佢似乎冇乜主動送上門嘅誘因噃！唔好忘記，栢志高名下位於西貢嘅住宅涉及僭建玻璃頂蓋及加建簷篷，佢又要忙於清拆僭建手尾，邊得閒落區。