政壇：金刀梁寸單雞着開襠褲

香港大學百周年紀念碑揭幕禮尋日舉行，出席嘉賓趁機緬懷在校嘅歲月，嘉賓名牌上印有畢業年份，早年畢業嘅港大校務委員會主席梁智鴻（金刀梁）似乎唔多想暴露年齡，想遮住個年份，單雞卻上前整鬼金刀梁，寸對方原來大自己二十年。

慘被白鴿黨單仲偕寸老嘅金刀梁並冇即時還擊，留待致詞時先至當住現場新舊港大生作大反擊，金刀梁話：「剛才單仲偕話我大佢二十年，如果係咁，我畢業時佢仲着緊開襠褲呀！」現場一片哄堂大笑。可見薑係老嘅辣。

同場仲有明德學院校董會主席張永霖（Linus），佢自爆六九年曾出任學生會幹事，講起特首梁振英發表嘅首份施政報告，Linus坦言管治香港唔容易，希望市民可以「領梁振英嘅情」喎！