政壇：李慧琼開會如打仗

樓房住屋係香港地嘅頭等大事，政黨更對呢瓣特別肉緊。我哋啱啱先講過，對本港樓市買家影響重大嘅《2012年印花稅（修訂）條例草案》受到建制派、工商界及泛民主派議員特別青睞，仲瘋狂加入印花稅委員會，搞到個會未開波場面已經好墟冚，尋日凈係想傾吓開會時間，都因為與會者眾、竟然難尋共識，最後要投票點人頭決定，以各界別對呢個委員會嘅重視程度，尋日嘅拗撬可謂小兒科，做主席嘅李慧琼想唔焦頭爛額睇怕都好難！

咁多派別瘋狂加入，目的都係就當局徵收買家印花稅（BSD）及加強版額外印花稅（SSD）一事互相角力，商界尤其着緊討價還價。不過，委員會多人爭不時可見，但搞到首次會議已經爆火花就唔多。尋日會議除咗選出正副主席外，仲訂出未來兩次嘅開會時間，但成員夾來夾去，都搵唔到啱嘅時間。

會議時間拗餐飽

啲議員拗乜呢﹖秘書處本來建議兩個日期舉行第二、三次會議，點知大家呢頭夾啱時間出席，嗰頭又夾唔啱其他委員會嘅會議。到秘書處提出早上八點半開會時，有啲委員就聲稱擔心時間太早有流會嘅隱憂喎，莫非佢哋擔心自己太早起唔到身，成為流會罪人。佢哋拗嚟拗去都冇結果，夾時間夾咗十幾分鐘後，最後要以投票解決。

尋日會議選出咗民建聯李慧琼同白鴿黨涂謹申做委員會嘅正副主席，一個建制，個派民，但BSD及SSD咁惹火，委員會嘅成員又咁多，呢個委員會第日開會恐怕少不了火紅火綠嘅場面，李慧琼呢個主席喺子彈橫飛，炮火連天嘅環境下，睇怕唔易做。