強積金畫地為牢 打工仔何曾自由

如果話人生係一座大牢獄，咁香港打工仔仲慘，成世綁住一把大枷鎖。乜嘢大枷鎖？咪就係強積金囉。明知跌落金融天仙局都走唔甩，焗住個個月將血汗錢奉上，你都咪話唔淒涼！

好嘞，等咗咁耐，特首梁振英首份施政報告終於出爐，強積金呢把大枷鎖有無機會解除呢？打工仔有無機會重獲自由呢？好可惜，答案係令人失望嘅。

施政報告係咁講嘅，當局會採取四大措施，令強積金收費下調，包括研究立法規定收費上限、整合強積金計劃、減省受託人處理程序、研究成立中央資料庫同「一人兩戶口」，部署實施「全自由行」，話畀二百萬打工仔最快三年後真正話事喎。唉，一聽就知又係治標唔治本，靠呢啲修修補補就可以搞好強積金，拯救打工仔？咪咁天真喇！

港府自己知自己事，施政弱過弱雞，跛過跛腳鴨，話要搞掂班金融大鱷，為強積金收費封頂喎，吹水就得，等到你哋傾掂數立埋法，好多打工仔都退晒休啦。至於乜嘢「一人兩戶口」、「全自由行」，花樣多多，其實完全不切實際，咪畀打工仔睇死吖，「一人兩戶口」遲早變咗「一味靠把口」，「全自由行」遲早變咗「全部不行」嘅咋。呢嗱，「半自由行」已經有辦大家睇啦。

嗱，當局推出半自由行時，吹到天花龍鳳，話可以壓低強積金收費喎。結果點呢？搞笑咯，調查顯示參與半自由行嘅打工仔只係佔總數百分之一，收費水平無減低不特止，反而仲升咗添，你話係咪得啖笑吖？事實證明，半自由行又好，全自由行又好，統統係不自由，如果當局唔肯徹底改革強積金，只係一味小修小補，等如畫地為牢，打工仔係無可能獲得真正自由o架！

講到尾，要打破強積金困局，最好就係當局承擔應有責任，好似新加坡政府咁做中央信託人。金管局管理逾萬億元外匯基金都做得到，點解管理強積金就唔得呢？究竟係唔想做，定係懶得做呀？如果係懶得做，太一叮唔勉強你哋，不如索性取消強積金，畀打工仔自己話事，起碼唔使白白畀班金融大鱷抽水吖。

積金誠可貴，收費價更高；若為自由故，兩者皆可拋。唔該官老爺大刀闊斧劈開強積金枷鎖，畀打工仔重獲自由，叮！