SUN搞作：打橫嚟講：被弗洛依德批中了！

梁振英前日噏讀《施政報告》時，曾用手揞住個心口，以示「拍心口」，為民辦事；但一個有智慧的政治家，尤其姓「梁」的，是不能做此舉措的，雖然是小小動作，也應有所計算，無理會「揞住梁心」去向市民講承諾o架！對嗎？

點知，擒日，梁先生出席立法會答問會又來一嘢「輕撫我的心」，配以梁朝偉電死人的迷人眼神，重中之重地向市民派支票，唉！真希望廣大的元秋型師奶全盤受落，勿再起事端啦！

何解，梁先生身旁咁多薪高糧準的親信，無一個好似占啤熊咁勇敢進言，糾正佢啲盲點錯行，唔好再出醜的呢？雖則小小瑕疵，但也不可三番四次的「重演」吧！因有三流評論員會將此解讀成弗洛依德的Freudin-slip，明屈，就不妙矣！

下次唔好啦！記住！

另一個舉動，也不能無止境的出現，就係掏出手帕抹汗。

點解？哦！乃因年初梁振英與唐英年在特首競選辯論時，被唐唐踢爆梁先生每凡講大話，定必「大汗淋漓」，所以，即使熱到嘔，不管何種理由或情況下，就算爆水喉咁噴水，都不許在鏡頭下當眾擦汗，咁好易讓人誤會，不打自招。防避如斯不幸出醜的準備，除了事前將射燈移歪及穿着單薄外，做佢下屬的飯桶，應在場不斷撥扇或遞草紙吧，咁簡單嘅嘢都做唔到，怎跟主子做實事呢？

一個出色的政治家，除口技了得、氹得死人之外，仲要有好的形象，今日，見梁先生肥腫難分，英氣盡失，加上失分的小動作，好難叫人信佢囉！都係身邊無叻人幫之故！自省自省吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府