政壇：《蘋果》又屈議員打壓遊行

《蘋果日報》早前明屈正在休假嘅行政會議成員林奮強講過「歧視新移民」論，事後林奮強主動播出當日聲帶澄清，《蘋果》先至認衰道歉，點知事隔幾日又有新受害者。

話說警方本周二首次就大型公眾活動包括集會、遊行封路及改道安排諮詢灣仔區議會意見。《蘋果》尋日報道，「新民黨區議員黃楚峰在會上認為日益增加的遊行，令區內居民及商戶感滋擾，希望警方限制遊行次數」，之後又搵不時搞遊行嘅民陣批評有關言論，原本黃楚峰講得出都唔怕畀人批評，最弊係根本無講過。

佢尋日喺社交網站澄清，會上佢講話大意只係希望警方同各持份者多溝通，疏導交通，令遊行更暢順，又話「認識我的人都知道我根本不會說這些話」，對今次事件感到好無辜喎。事實上，根據當日佢嘅發言錄音，主旨都係想遊行暢順進行，根本無「限制遊行次數」呢幾個字出現過，唔通《蘋果》屈人已到咗上癮嘅地步？