政壇：人力自爆獲50萬捐款

人民力量（人力）前日喺網上公開宣布收到五十萬元巨額捐款，原來呢筆捐款有段古。人力主席劉嘉鴻透露，舊年底有支持者親臨黃毓民地區辦事處，話想捐錢畀人力，議員助理當時隨手提供咗人力個銀行戶口，點知對方真係入咗五十萬元落人力戶口。

至於點解人力會公開收咗筆捐款，主要因為早前因收咗建制派一筆捐款而惹來外界批評及猜疑，所以人力執委會早前通過動議，規定日後收到六位數字或以上捐贈，都要喺網上公開詳情，方便市民監察。過去政黨經常被批評收咗幾多捐款都冇人知，所以今次人力踏出第一步將捐款透明化。另外，因為建仔劉江華加入政府而懸空嘅沙田區議會田心選區議席，將於三月補選，提名期今日開始，白鴿黨今朝會搶閘報名。盛傳有意加入戰團嘅人力已經敲定人選，派出做過人網主持同出過書嘅林匡正出選。