醜聞攞獎揚威 貪曾實至名歸

恭喜晒，前特首曾蔭權爵士，你落台半年淪為過街老鼠，成日頭耷耷無面見人，今日終於光宗耀祖，一日攞多獎，揚威頒獎台！

貪曾攞咩獎？就係「特區政府十大浪費公帑選舉」同「政壇十大謊言選舉」嘞。一睇個名銜，就知貪曾三甲必入，實至名歸啦！

嚟，先公布十大浪費公帑選舉結果。登登登櫈……貪曾憑住私吞一百八十萬元公家茅台酒勇奪……第三名！大家應該記得，貪曾執包袱搬出禮賓府令到大量「曾藏品」絕密曝光，包括至少十箱合共六十瓶「香港回歸十年紀念珍藏」天價茅台酒被鬼鬼祟祟運往前特首辦公室私藏。呢單嘢唔止貫徹貪曾無出其右嘅貪婪本色，私吞公家佳釀更相當於庫房少收超過百萬元公帑，呢個獎貪曾真係當之無愧o架。

嗱嗱嗱，貪曾同冠軍寶座失諸交臂唔使失望，公道自在人心，只係因為評審無計埋你周遊列國歎總統套房嘅超級混帳，先至令你意外失落浪費公帑排名榜阿一位置，大家明嘅。

更何況，仲有十大謊言選舉補數。無錯，又係你呀貪曾，今次仲獨佔鰲頭攞第一，「痛心特首」嘅寶號再一次得到充分肯定。嗱，貪曾傍住富豪黐飲黐食窮貪極舔，被東方報業集團踢爆連串貪遍省港澳、歎盡海陸空醜聞之後，居然夠膽話自己按足本子辦事，對得住良心喎。叮佢個鎯鎯，咁荒謬嘅大話都講得出，呢個謊言大獎唔頒畀佢，仲頒畀邊個呀！

貪曾唔知係咪預知會上台攞獎，曾經發開口夢話希望落台之後市民會忘記佢喎。但係佢在位七年唔止無能，仲無恥兼無賴，話唔定嚟緊仲有十大貪官、十大庸官等等頒獎禮等佢上台領獎。咁搞法，莫講話落台之後，就算化咗灰，市民都好難唔記得佢喎。

都好嘅，貪曾攞獎可以再次提醒市民，高官靠得住，豬乸會上樹。正如舉辦選舉嘅「107動力」話齋，一年一度嘅選醜盛事可以警惕官老爺唔好胡作非為。話時話，從貪曾獲獎就知港府病源，所謂上樑不正下樑歪，港府頂層腐朽頹廢，下層官員無可能唔東歪西倒，施政又點會好呢？

仲有呀，官老爺浪費公帑十年如一日，年年被人揭醜，年年問題照舊，原因正正就係失職官員好似貪曾咁，醜聞連篇都唔使問責，無人追究。不如咁啦，以後庫房損失幾多，失職官員就賠償幾多，咁就包佢哋唔敢大花筒嘞。貪曾快啲嘔番天價茅台嘅一百八十萬出嚟！

係喎，內地茅台酒爆出含有可導致男士雄風不振嘅塑化劑毒素，貪曾係咪飲到男人之痛冇人知，但施政陽痿係有目共睹。梁振英政府唔該快快撥亂反正，重振雄風，如果唔係，萬一又搞到大量公帑一洩如注，咁就該煨囉，叮！