政壇：政商定格：高永文唔慣當眾穿圍裙

九龍婦女聯會尋日舉辦咗個烹飪比賽，邀請食物及衞生局局長高永文做頒獎嘉賓。大會要求台上嘉賓無論男女，都要着住該會設計嘅綠色圍裙，當高醫生接過手上嘅圍裙時，面上露出尷尬神色，佢致詞時更笑言，自己「仲未好適應今日呢個形象」喎！

高醫生話平時喺屋企就着得圍裙多喇，今次係第一次以圍裙形象展示人前，所以有啲唔習慣。佢話自從入咗政府呢個「熱廚房」之後，屋企個廚房都入少咗好多，但咁樣反而令佢更加珍惜下廚嘅機會。

佢又話，雖然自己好鍾意食嘢，但係內心好清楚，美味嘅食物都係「三高」，即係高糖、高鹽、高脂，食得多會影響身體健康，所以美食當前，佢都唔可以掉以輕心，每年都會定期驗身。