政壇：政商定格：鄺其志唔鍾意肢體衝突

早前傳出港交所前行政總裁「神童」鄺其志，喺馬會泳池將華人置業副主席劉鳴煒個頭撳落水，馬會喺收到投訴後褫奪神童遴選會員資格。好耐冇出席社交場合嘅神童，尋日現身新民黨慶祝成立兩周年酒會，首次開腔解釋事件。

神童話成件事純屬傳聞，自己一向脾氣好，唔會同人打交，更唔鍾意同人有肢體衝突。佢仲話依家隔兩日就會去游水鍛煉身體。被問到仲有冇去馬會游水時，佢就神神秘秘咁話：「我唔答你。」

場內又見到政制及內地事務局副局長劉江華，佢話上任未夠一個月，仲要時間適應摸索下。佢仲話返新工後都有打電話畀唔同黨派議員傾偈，但因為之前好多人放假唔喺香港，所以有啲未聯絡到，一定會盡快逐一拜會。