政壇：搞搞政：政府諮詢差劣 田二少插貪曾

新政府上場後面對連番挑戰，推出唔少政策都畀人鬧冇做好諮詢，好似「五司十四局」改組、新界東北發展等，全部被人批評霸王硬上弓。立法會議員田北辰尋日喺香港電台節目《香港家書》講到有關情況時一語中的，話今時今日出現呢個政治局面，多得以往政府唔識做諮詢工作，令現屆政策好事變壞事。唉，估唔到「貪曾」離開幾個月，都繼續遺禍人間，真係害人不淺。

田二少話參選立法會時，都盡量將政綱同施政理念話畀選民知，但以往政府根本唔識咁做，每逢做諮詢工作都流於表面，向市民解釋時只用單向、用語艱澀難明字眼，社會未有共識就硬闖立法會，同「撼頭埋牆」冇乜分別，最終搞到市民懷疑政府推出政策係另有目的。

佢真係講得無錯，貪曾過去多年就係咁，令霸王硬上弓文化遍布成個政府架構。就算現時改朝換代，由梁振英執政，但成個體制已做到慣晒手勢，要一段時間至可以改變，搞到近期推出政策的手法都好似前朝政府咁，最終加劇民怨。