政壇：發叔體弱「扶手專員」傍實

新界鄉議局主席劉皇發因大感冒要住院兩星期，絕迹政壇差唔多成個月，搞到好多政界中人都對佢嘅健康議論紛紛。

建仔主席譚耀宗喺屯門開辦事處，踩入發叔嘅地頭，佢點可以唔出現呢？雖然唔多覺發叔有減磅，但唔知係咪住得醫院太耐，明顯成個人「謝」咗唔少，冇以前咁精神，無論係舞獅定剪綵，佢都好似吽吽地咁，冇乜心機。

有記者問佢依家身體點樣，佢都耍手兼擰頭，一味指住自己喉嚨，話醫生叫佢唔好講咁多嘢。闢謠之餘，佢仲大派定心丸，細細聲話雖然仲有幾聲咳，但只要定時食藥就得，仲話自己後日將會「復出」聆聽梁振英讀施政報告。但係建仔為怕發叔凍親跌親，尋日派出屯門區議員吳觀鴻做發叔「扶手專員」，都算唔話得啦。