政壇：建仔銀彈撼鐵頭仁

過去兩年係選舉年，先後進行咗區議會、選委會、特首選舉、立法會同港區全國人大代表等幾個選舉，未來最快要等到二○一五年區議會選舉先再度開戰。

咪以為呢段時間，各政黨可以休養生息吓，但一場選舉嘅完結就係另一場選舉嘅開始，各政黨已經開始備戰嘞，作為「萬人黨」嘅建仔都唔例外。建仔主席譚耀宗尋日殺入屯門啟豐花園開地區辦事處，嗰度嘅當區區議員正正係白鴿黨前主席「鐵頭仁」何俊仁，可以話係踩入白鴿老巢，目標非常明確。

譚Sir開辦事處，唔通下屆區議會選舉由佢親身上陣同鐵頭仁硬撼？當然唔係啦，原來辦事處用譚Sir嘅名義開，但實際係畀社區服務主任侯國東打骰，譚Sir仲同街坊講，話有乜嘢事都要搵阿東幫手，即係擺明捧呢位後生仔上位。

侯國東些微票落敗

譚Sir話個辦事處嘅月租都要萬幾蚊，但只要服務到街坊就值得。嘩，以往通常係選贏區議員，先有資源開辦事處，但建仔竟然係掉番轉，為咗鞏固地盤，不惜大灑金錢，咁捨得揼本，唔怪得之建仔近年咁多新人湧現。

喺上屆區議會選舉，阿東曾經喺屯門區議會兆禧選區挑戰民協嚴天生，最後以些微票數落敗，依家轉區到鐵頭仁呢區，其實喺地區嚟講，嚴天生同鐵頭仁都係一樣咁重量級。點解咁擺位？唔通連建仔都覺得，白鴿黨容易應付過民協？