廢氣年殺三千人 廢官無能禍香江

唔講唔知，原來香港係中國最烏煙瘴氣城市之一，空氣污染嚴重程度幾乎冠絕神州，問你怕未。

嗱，統計數字冇花冇假，唔係嚇你o架。環保團體分析發現，舊年全港十四個一般及路邊監測站，有十三個嘅五種污染物濃度超出世界衞生組織全年平均標準，其中二氧化氮濃度更錄得有紀錄以來第二最差，喺卅二個中國城市中排尾二，只係比包尾嘅新疆烏魯木齊好少少咋。

大家唔好忘記，烏魯木齊係經濟相對落後嘅內陸城市，主要用煤作燃料，空氣差唔出奇；而香港自稱金融中心、國際都會，依家搞到同烏魯木齊睇齊，乜架都丟清光咯，叮！

係人都知，空氣污染係健康殺手。有醫學專家根據污染數據推算，本港舊年有超過三千人因為空氣污染併發疾病早逝，死亡人數比○三年沙士高十倍以上。算完健康帳再算經濟帳，空氣污染舊年為本港造成嘅經濟損失接近四百億元，拍得住政府全年嘅醫療衞生經常性開支。如果同○二年嘅同類研究相比，死亡人數及經濟損失分別急升近四倍及二十三倍，你話可唔可怕吖！

話時話，本港空氣質素每況愈下，早就唔係乜嘢新聞，唔止港人身受其害，連唔少跨國公司及海外人才都因為擔心健康受損而對香港敬而遠之，呢方面嘅損失又何止幾百億吖。

講嚟講去，香港淪為「廢氣之都」，藍天白雲愈叫愈走，都係多得「氣候逃犯」曾蔭權爵士咯。佢喺改善空氣質素方面根本冇做好自己份工，拖得就拖，搞到香港烏煙瘴氣，為現屆政府留低一個爛攤子，認真好帶挈。

呢，審計署前排發表嘅報告直插前朝環保政策出現連串失誤，包括空氣質素指標二十幾年冇更新，污染水平長期超標等等。最離譜就係，環保署○六至○七年度訂定嘅服務表現目標，承諾全年空氣污染指數唔會超出一百嘅甚高水平，家陣超標日數不減反增，五年間升幅接近一倍半。有人話，香港廢氣愈來愈多，皆因港產官僚愈來愈廢，真係一啲都冇講錯。

無論點都好，貪曾禍港殃民，污染香江，新政府必須撥亂反正，唔可以畀呢個問題無止境咁拖而不決。好似減少汽車廢氣同電廠排放咁，已經講咗N年，如果再攞唔出切實可行嘅措施，有人隨時做「氣候逃犯二號」嘅咋，叮！