Sun奇古怪：Sun潮語：【囧樣】

新一屆特區政府的施政報告，即將於禮拜三發表，大家都好期待梁特首到底有咩辦法，解決香港現時嘅深層次矛盾。政府近日已經喺電視賣廣告，宣傳緊呢份施政報告。但係老實講，個電視廣告相當無厘頭，因為片中嘅演員無論男女老幼，全部都無頭！廣告片用咗一啲電腦符號，去遮住每個演員個頭，搞到好似香港人睇咗份施政報告後，就會無面目見人，甚至有網民戲謔，莫非政府想我哋香港人人「囧樣」？

潮語「囧樣」，意思係當你遇到一啲唔合理或難以接受嘅事情時，面部出現嘅神態。因為通常遇到呢個情況嘅時候，你都會皺眉同「O嘴」，表情同個「囧」字外形相當神似。所以潮語「囧」就係用嚟表達嗰種面對膠人膠事，而講唔出嘢嘅心情。例如，當你見到一啲議員，將男人忘記結婚周年嘅疏忽，比喻作睇唔到自己屋企有僭建嘅疏忽，你就可以用「囧」嚟回應。再舉個例，當你喺電視見到，某電視台高層突然喺政府總部門外，騎呢地同其他藝員一齊大跳「騎馬舞」，你亦只能報以一個「囧樣」，或者乾脆打爆個電視洩忿。

電視台亦有一位女藝員，因做戲嘅時候經常皺眉，被網民戲稱為「胡囧囧」。不過「囧」時「囧」，有時「囧」都可以好成功。就好似中國大陸有一套電影叫做〈泰囧〉，屬小成本製作喜劇。第一集推出時，竟然可以收五千萬人民幣。最近上畫嘅續集〈泰囧2〉，繼續玩中泰文化差異所帶出嘅笑話，竟然大收超過十一億人民幣！連幾套投資過億大片嘅票房都望塵莫及。套戲本來只係上聖誕檔期，依家要「被延長」放映期至農曆新年，真係「囧」出個未來！