政壇：搞搞政：性傾向立法諮詢譚志源被屈

立法會選舉結束後，人民力量議員陳志全（慢必）就「出櫃」承認同性戀者身份，隨後本地有關反性傾向歧視嘅行動一浪接一浪，最近捲入漩渦嘅係政制及內地事務局局長譚志源（Raymond），事關泛民主派議員大力吹風，話政府會喺《施政報告》交代《性傾向歧視條例》立法諮詢工作，但政府就急急澄清，原來當中涉及Raymond嘅一番言論，甚至有被屈之嫌！

慢必前日喺記者會話最憤怒嘅係本來啲官員已經明示、暗示話會交代諮詢工作，但依家又話唔搞。我哋翻查資料又唔見喎，雖然Raymond曾經喺立法會政制事務委員會提過，特首梁振英會喺一月份《施政報告》交代，但都只係話會掌握最新嘅情況同變化，以決定點樣可做好消除性傾向歧視嘅工作等，冇講過政府會喺《施政報告》交代立法諮詢工作。