政壇：消防處長千金擸警校兩獎

香港警察學院尋日舉行結業會操，約有二百個督察同警員畢業，其中一名到場嘅嘉賓竟然係消防處處長陳楚鑫，原來佢到場係支持寶貝女陳奕妍畢業。科大高材生嘅陳奕妍尋日一次過攞晒施禮榮盾及榮譽警棍兩項殊榮，佢仲好謙虛話，父親經常教誨佢「做人最緊要唔好計較咁多！」

二十六歲嘅陳奕妍，同父親陳楚鑫嘅樣貌成個餅印咁。佢○八年於科大經濟及財務學系畢業後，隨即投考見習督察，但落選，但佢冇放棄理想，去東區警區做一名散仔，多番努力後終成功晉升督察，駐守深水埗。