政壇：木蝨基反擊鼠王芬

西九新動力立法會議員梁美芬（鼠王芬）幾年前到旺角街市滅鼠一役成名，吸咗唔少地區樁腳外，政治能量亦係咁升，相反貴為超級議員嘅民協馮檢基（阿基）盤據九龍西多時，但一直係立法會一人黨，地區勢力更被人虎視眈眈，最近阿基終於諗到絕招反擊，就係喺地區主打木蝨問題，藉此抗衡政治對手，木蝨基大戰鼠王芬一觸即發，鹿死誰手就要睇邊個高招喇。

老巢「攻不銳守不穩」

深水埗區木蝨為患，本報喺去年多次曾經獨家踢爆木蝨攻港路線圖同時間表，偏偏民協卻因為阿基進身超級區議會，喺九西老巢嘅資源「有縮無增」，多個根據地都有被建制派攻陷之危，據聞由鼠王芬領導嘅西九新動力最近都心思思，睇準民協老巢有「攻不銳，守不穩」弱點，密謀喺下屆區選重錘出擊「拔筍」（竹筍係民協徽號）。

事件令阿基更加驚，早前聯同六個區議員聯名提交名為「要求政府全面處理木蝨問題」嘅文件畀深水埗區議會，要求喺本周二舉行嘅區議會大會上討論，意圖重新搶番基層市民代言人嘅地位。

以滅鼠起家嘅鼠王芬幾乎變成九龍西衞生問題嘅代言人，相反阿基喺九龍西打滾多年稱號都唔多個，今次阿基搖身一變成為「木蝨基」，打正旗號滅蝨實在係許勝不許敗，究竟木蝨基同鼠王芬邊個先可以獲勝？呢個大家就要拭目以待喇！