官地被佔三十年 又見官僚鬥卸膊

港產官僚真係無地自容。呢頭猛呻無地建屋，嗰頭任由官地被人非法霸佔三十年，咁搞法，港府何止無地自容，簡直無面見人吖，叮！

申訴專員公署踢爆，沙田排頭村有塊原本劃作休憩嘅官地，畀人霸咗足足三十年，變成萬能用地，有人喺度擺賣，有人喺度晾衫，有人喺度種花，有人甚至喺度非法泊車，無奇不有，各適其適，當正官地係私地，問你服未！

不過，咁都未算吖，最令人服到五體投地嘅係政府部門嘅荒謬反應，佢哋唔止無阻止霸佔官地嘅劣行，反而體貼到將呢個非法停車場出入口嘅下陷路面鋪上防滑鋼沙，真係服務周到。正如有人狠批，當局咁做簡直係助紂為虐，唔係鼓勵違例泊車又係乜嘢呀？

三十年唔係三十日呀，一塊位於鬧市嘅官地畀人長期非法霸佔，港產官僚居然不聞不問，闊佬懶理，你話佢哋返工唔係大覺瞓都無人信啦。

官老爺點樣解畫呢？地政總署話喎，小販同泊車人士係流動人口，該署管唔到，所以交咗畀警方同食環署跟進。民政事務總署就話，曾經向村民提出不准泊車，但係村民強烈反對，所以向地政總署建議維持現狀。至於運輸署咯喎，就話違泊唔係佢哋職權範圍，車輛出入官地無交通安全問題，所以就無作出取締嘞。

唉，原來港產官僚唔止識瞓覺，仲識踢波兼耍太極，你推我卸，將個波交嚟交去，唔喺自己手上就當無事發生。俗語話，三個和尚無水飲。太一叮就話，三個童軍跳彈床，做嘢是是但但之餘，仲將責任彈嚟彈去。呢種官場陋習唔改，試問政府點可能適度有為呢？

話時話，政府部門疏懶失職搞到官地畀人長期霸佔，呢單只係冰山一角咋。審計署上年踢爆元朗大棠荔枝山莊霸佔官地十八年，佔地多達四萬幾平方呎，簡直匪夷所思。唔怪得當局搵唔到地起屋喇，官地唔係畀人佔據做牟利遊樂園，就係畀人非法霸佔做停車場，咁搞法，多多地都唔夠用啦。

政府放風話，施政報告將會交代建屋大計喎。其實計太一叮話齋，唔該當局清理咗庸懶官僚先啦，如果唔係，去邊度搵地建屋喎，叮！