SUN搞作：打橫嚟講：丑武旦，名留立法會

前日，立法會啟動香港史上首個彈劾政府高層的議案，在此，一定要表揚和感激一個人，那人，不是提出彈劾議案的梁國雄議員，亦非仗義協助撰寫「罪狀」的郭榮鏗議員，而係巴渣騎呢的民建聯大嬸蔣麗芸。

中國戲劇，尤以大陸文革式樣板戲，一定係忠奸分明，正邪兩立的，而角色分配，亦甚有行規，簡單劃分，除男女主角之生旦外，配角職能也十分重要，例如小武打觔斗，有動感的視覺效果，增強舞台的吸引力，另外，雖然可有可無，但最受觀眾歡迎的，就是丑角，因有此角色出現，即使幾沉悶的場口，亦活潑開心起來！

要表揚蔣麗芸大嬸，原因不特止有佢份的事，娛樂成分高之外，佢仲身兼埋「好打得」的大炮手一職，真也文也武也！做小武到家，做小丑就更耍家！

嗰日，蔣大嬸論論盡盡的讀出那段愛的宣言：「好多男人連自己結婚紀念日都唔記得清楚啦！何況個（僭建）花棚？……我認同佢真係可能唔知有僭建物存在，佢更無任何動機講大話……」呢段講稿，連周星馳都度唔出，也未算經典，反而，佢大喊：「法庭字典裏面所有形容詞真係差唔多畀佢哋用晒，包括虛假、蓄意、欺騙、拖延，仲有損害新聞自由、操控香港政府、傷害市民……」蔣大嬸所講每隻字，都會原汁原味全記錄在香港政府檔案裏的，為香港史充實證據，怎能不表揚佢！

當社會太悲情時，政治娛樂化，真好！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府