政壇：政商定格：潘偉業小登科盡力造人

龍年將盡，兼任青年聯會會董、菁英會成員、工業總會青委嘅玩具公司太子爺Albert潘偉業把握良辰吉日，同電視台前主播女友Akiko鄺晶晶拉埋天窗。當晚喺酒店大排筵席，現場仲播出Albert求婚經過，原來佢趁晶晶開咪主持直播節目時，突然遞上鮮花同婚戒，認真搞鬼。Albert又感激父母養育之恩，更承諾未來會盡力「啤番件識郁嘅玩具」畀父母玩添！

今次宴會場地布置由兼營婚宴公司嘅Akiko一手包辦，佢嘅新婚願望係增肥，調理身子再努力造人。榮升新老爺嘅潘少忠對新抱讚不絕口，話佢人靚口才又好，畀足一百分。恨抱孫恨到發燒嘅佢話，起碼要佢哋生兩個，仲笑稱自己「重女輕男」，皆因膝下只有兩位公子，希望可以抱到孫女，已預備定「金多寶」獎金贈予新抱喎。