政壇：李遠康佩服茶餐廳術語

每個成功人士背後都有一個故事，翠華茶餐廳老闆李遠康尋日喺一個研討會上話自幼家境清貧，年紀小小就投身社會，二十歲已進身餐廳大廚，但對於行業中嘅陳規陋習卻渾然不覺，例如廚工衣着懶得清洗，侍應都不修邊幅，甚至食煙飲酒講粗口。

直至有晚李遠康媽媽趁佢好夢正酣，唔抵得為佢修剪過長嘅指甲，李遠康至驚覺衞生嘅重要，從此明白茶餐廳嘅地痞形象必須要改變，於是為餐廳引入咗現代化管理，培訓員工嘅專業形象，為顧客提供整潔舒適嘅進食環境，終於有今時今日嘅翠華。

雖然李遠康摒棄舊日嘅茶餐廳文化，但對前人嘅經營方式仍相當佩服，佢話往日茶餐廳有好多術語，例如烘多士叫「火燒床板」，滾水蛋喚作「師姑跳海」，阿華田又名「敗家仔」等，佢話呢啲術語係欠缺電腦嘅時代，方便侍應記憶之作，雖略帶戲謔，但亦體現當時從業員嘅智慧。