政壇：張樹槐沙漠毅行「撲水」

恒生銀行傳訊及企業責任總監Walter張樹槐再向難度挑戰，將喺今年十月到撒哈拉沙漠毅行一百公里，為第三世界「撲水」，以改善供水設施及衞生情況。

要喺撒哈拉沙漠行一百公里並唔容易，Walter話除咗要攀過海拔一千二百公尺嘅山脊外，仲要行過沙丘陣、乾旱草原，仲要五日冇得沖涼！其實咁辛苦都只係希望可以籌二十萬元善款，資助多個非洲及亞洲貧困地區改善食水衞生。Walter咁落力，一眾恒生高層率先以行動支持呢項善舉，該行副董事長兼行政總裁李慧敏、恒生中國副董事長兼行長薛關燕萍齊齊捐錢，就連曾經喺恒生工作過嘅恒基地產獨立非執董歐肇基、新地執董兼首席財務總監陳國威等都二話不說出錢支持，相信善款數字隨時超額。