政壇：蔣麗芸撐CY廿年情不變

立法會前日辯論彈劾特首CY梁振英議案，建仔議員Ann蔣麗芸全力為CY護航，發言時七情上面，仲爆出「男人結婚周年紀念日都記唔清，何況個花棚？」嘅金句，令工黨議員李卓人都不得不慨嘆「我都知愛情係盲目嘅」。

阿Ann嘅發言引起好大回響，有市民尋日就打電話上電台節目話︰「我覺得佢（Ann）心入面係仰慕梁振英、愛慕梁振英，好似女朋友撐男朋友咁，話佢做咩都唔係有心、係為大家好咁。」亦有自稱喺選舉時投票畀阿Ann嘅聽眾話覺得佢滿口歪理好離譜，好後悔投票畀佢，仲話要喺元州邨發起簽名運動要求佢落台咁話。

有網民亦摷咗段片，「揭發」阿Ann同CY嘅二十年情。原來佢哋喺九○年曾一齊主持香港電台一個叫《亞洲經驗》嘅節目。節目主要講各地經濟發展，當時嘅CY說話已好流利，間唔中仲展現充滿自信嘅笑容。而坐喺隔籬嘅阿Ann雖然有啲口窒窒，但尚算斯文淡定。

阿Ann尋日澄清成日唔記得結婚紀念日嘅係自己，唔係老公。而佢老公梁海明就大讚老婆發言精彩，仲話佢哋日日都係結婚紀念日，唔使成日記住。聽完梁海明咁骨痹嘅回應，市民對阿Ann同另一位梁生之間嘅關係，應該唔會有乜嘢聯想啦。