勤奮二廚1/3薪金畀家用

【本報訊】疑醉死的阿杰，生前讀至中三便輟學，投身社會任廚房學徒，經六年勤奮工作，現時在擺花街一間高級西餐廳任職二廚。俊杰的友人聞他不幸喪生，在facebook網站紛紛留言：「希望你一路好走……來世我哋再做好兄弟！」亦有朋友留言：「真係接受唔到！ 好難受！」

阿杰早上十一時上班，晚上十一時下班，每月有萬多元收入，會將三分一交給父母作家用及供樓。父親在港鐵任職技工，母為家庭主婦。阿杰的父親表示，每月收入大部分用於供樓，至近月才供完樓按，故家中並無積蓄，兒子突然離世，殮葬費亦成問題。他續稱，兒子身體一向健康，只是較少運動，無不良嗜好，間中只飲啤酒，亦少夜蒲。

阿杰以「寶貝」稱呼女友阿Mei，去年十一月，更將二人首次拍拖睇戲的電影戲票貼在facebook上。友人聞死訊，昨紛在facebook網站留言：「杰仔，你知唔知，我好難過，識你十年話走就走，連你最後一面都見唔到，我愧對於你。希望你一路好走！我會等你返嚟搵我！ 話我聽發生咩事！ 今日你比我先走一步，來世我哋再做好兄弟！」亦有朋友留言：「尋晚你仲叫我去唱K嫁（o架），真係接受唔到！ 好難受！」