叫停教育產業 勿再誤人子弟

梁振英首份施政報告即將出爐，唔知大家有乜期望呢？嗱，港大最新調查顯示，六成三受訪者最關心民生問題，兩成二關心經濟，只有一成二關心政治。調查結果好清楚話畀政府知，講乜都係假，搞好民生最實際。

點樣先至可以搞好民生？話易唔易，話難都唔係好難啫，最緊要腳踏實地，千祈唔好學前朝貪曾政府吹水唔抹嘴。大家應該記得，曾蔭權爵士喺○九年嘅施政報告中提出發展六大優勢產業，尤以教育產業為首，聲稱要打造所謂區域教育樞紐喎，點知到頭來唔只一事無成，仲搞到一鑊泡添。有消息話，嚟緊嘅施政報告除咗將重點放喺房屋等問題之外，仲會着重檢討教育產業，唔排除隨時叫停o架。

咁就啱嘞，冇咁大個頭唔好戴咁大頂帽，香港根本冇條件搞教育產業，夾硬嚟盞添煩添亂嘅咋。正如教育界人士話齋，本港又缺乏土地，又唔夠宿舍，搞教育產業不切實際，貪曾立心不良，只顧賺錢，早就要叫停喇。

講到賺錢，眼前就有一個例子。話說舊年係新舊學制兩批學生同時升大學嘅「雙班年」，大批學生擔心無學位而同時向多間自資專上院校繳交幾千元「霸位費」，結果令留位費撻訂額高達二千二百多萬元，淨係香港大學附屬學院咋，就淨賺六百三十四萬元，簡直無本生利。

呢啲咪就係所謂教育產業嘅後遺症囉。依家嘅專上院校唯利是圖，見錢眼開，唔係春風化雨，作育英才，而係將教育當生意，將學生當羊牯，搞到副學士濫收超收有之，留位費賺到盆滿缽滿有之，大學淪為學店，問你服未。有立法會議員就講得啱嘞，好多本地學生就算符合升讀大學資格，亦因為唔夠學額而成為犧牲品，當局連本地學生嘅需求都照顧唔到，仲花資源搞教育產業，根本係本末倒置。

講嚟講去，所謂教育產業，唔係為學店製造搵錢機會，就係優待貴族學校，為有錢人提供服務。例如貪曾政府賤價批地甚至提供免息貸款畀英國哈羅學校咁吖，純粹為權貴子女服務，同普羅市民完全冇關，同教育產業更加係風馬牛不相及。孔子話「有教無類」，而喺香港，只有權貴子女至有機會接受優質教育，當局一手製造跨代貧窮，唔怪得貧富懸殊愈來愈惡化喇！

計太一叮話齋，教育產業掛羊頭賣狗肉，呢個怪胎唔止要檢討，直情要叫停，希望現屆政府撥亂反正，唔好再誤人子弟，叮！