SUN搞作：打橫嚟講：捍衞好人要有好報

嘩！咁都得？真係蠢到無朋友囉！呢班正九品芝麻官（按大陸語言文化，簡稱「九官」）。

呢件前朝曾蔭權麾下招攬入局的邱誠武小九官，唔知係食錯藥？定係未食藥？居然向全世界宣布「劏房好有存在價值」喎！

正如梁國雄議員話齋：「棺材夠有存在價值啦！你要唔要吖？」

香港呢個黑白不分、顛倒是非的謊言政府，愛講大話的癌細胞已深入骨髓，講嘢唔經大腦乃係正常不特止，仲要涼薄到向人民傷口處灑鹽，邱副局長，竟理直氣壯話「有啲劏得好『四正』添！」佢講緊嘅係佢老細劏房波嘅私幫生意？呢啲咁嘅言論（或政策），係佢個人承接上層煲呔政權時的愚見吖？或是今屆大話政府的「實事」方針，覺得成熟一項推一項呢？

我都贊成有啲嘢，若果係「有存在價值」的，應好好保留，例如啲庸才廢柴九品芝麻官，有佢哋喺度放風試水溫，萬一勢色唔對，畀人燒數簿，都有佢哋喺中間，做箭靶，頂一頂，墊屍底吖嘛！呢啲就係謀略！就係不妨畀佢試做吓先啦！人哋未做就鬧，點知佢做唔嚟呢？

劏房同僭建一樣，已令香港成為全世界鄙視的象徵，即如專門說謊的大話精，和沒誠信的劣行，都應被人抦的。

如果我哋仲視之不理，甚或包庇這缺德敗類，要譴責佢，呢個社會再無須講信用、行公義、只靠旁門左道呃騙巧取，咁呢度仲使有好人嘅？無好人，點會有好報？所以，見個人賤精九官，見一鑊打一鑊，不手輕！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府