政壇：搞搞政：劉江華低調落區不留痕

入咗政府出任政制及內地事務局副局長嘅劉江華，行事似乎低調好多，由港區全國人大代表譚惠珠做榮譽會長嘅香港促進現代化專業人士協會前日舉行周年晚宴，特首梁振英應邀出席，據聞劉江華都有出席，計起上嚟，今次仲係佢首次以副局長身份出席大型活動，有網民事前收到風打算去「贈興」，但未聞有人被狙擊，估唔到劉江華嘅「第一次」就咁無聲無色過咗去。

劉江華入政府，外界批評聲音唔少，而各界都好關注劉江華嘅官場表現，第一次靜雞雞冇咗，大家都唔使失望，事關佢好快又會出現喺公眾面前，本周五佢會同局長譚志源「行孖咇」出席深港合作會議，聽聞政務司司長林鄭月娥都會出席，劉江華到時會否主動用普通話同內地官員打交道呢？

喺政壇打滾多年嘅佢，曾被嗌做「劉華」或「江華」，轉換新環境後又點呢？有知情人士話，不外乎有三種叫法，包括「江華」、「副局」同「劉先生」，當中以「副局」呢個稱呼應該對佢嚟講係最新鮮噃。