政壇：梁美芬重錘圖九西拔筍

盤據九龍西多年嘅民協係立法會長年嘅「一人黨」，咁多年只得馮檢基喺議會孤軍作戰，進身超級議席後，阿基要面向全港，好難再集中人力物力死守九龍西一區，據聞梁美芬嘅西九新動力，諗住籌備下屆區選重錘出擊明搶民協票源，姑且睇吓佢哋嘅「拔筍」（竹筍係民協徽號）大計行唔行得通。

西九新動力中人評估過，民協現時剩低喺九龍西嘅十一個議席，雖然過往幾屆勉強力保不失，但唔代表呢啲議席牢不可破，因為該區有唔少舊樓已經重建，選民唔再單一偏向基層，所以西九新動力呢類形象較獨立、好似好中產嘅政團應該有力與民協一戰。不過，聽聞自由黨都想加入拔筍行列，佢哋決定下屆區議會選舉只集中搶攻三大區域，分別係香港島、新界東及九龍西。