政壇：葉劉打網絡戰谷新民黨

新世代多咗好多溝通工具，新民黨主席葉劉淑儀雖然忙於政務，但政圈中人都知佢亦係facebook發燒友，佢嘅fb上經常可見佢嘅更新訊息。尋日朝早，葉劉一如往常咁出席行政會議，不過，今次佢專登帶埋助理嚟影相，一襲中褸皮褲襯高跟鞋嘅葉劉啱啱現身政府總部，已經令人眼前一亮，睇嚟佢專登執靚靚上鏡噃。

葉劉鍾意玩fb，仲利用呢個平台同媒體及支持者互通訊息，不時可見佢主動上載自己影嘅相。尋日早上，幾名爭取同志平權嘅團體代表喺行政會議會場外請願，一見葉劉行入嚟，佢哋即刻好踴躍同葉劉握手，又猛落嘴頭游說葉劉支持反歧視，唔通新民黨嚟緊計劃主打呢個戰場，所以葉劉開行會都叫助理幫佢手影相？