政壇：雙失黃成智冇得揀

立法會改選之後，民主黨（白鴿黨）泛民大黨嘅地位岌岌可危，黨內議員更一片禾雀亂飛嘅慘況，好似新東嘅黃成智一夜之間由「雙料議員」變成「雙失議員」，政途冇運行，黨內地位亦堪危，更弊嘅係，連多年耕耘嘅地區支持勢力都散散哋，距離選舉三個月，佢終於翻兜做「出路社會服務中心」社會服務總監，搵到位落腳雖然解決咗雙失困境，但再一次凸顯佢同「出路」有千絲萬縷關係啫！

唔提鴿仔身份

黃成智喺選舉期間遭本報獨家揭發以「出路社會服務中心」等友好組織名義，向長者免費派發麵包捲入涉嫌賄選事件，當時佢對係咪辭任「出路」主席嘅版本多多，一時又話已辭任，一時又話董事會仍未討論，依家真相大白喇，黃成智翻兜，如果話佢同「出路」關係唔密切都冇人信啦！

不過，黃成智嘅新卡片都令人有好多疑問，事關佢喺卡片中絕口不提其白鴿黨成員嘅身份，反而標榜佢係「出路」社會服務總監。更令人意想不到嘅係，黃成智早前舉辦活動時竟向建制派工商界「撲水」搵贊助，事後究竟呢班工商界有冇贊助或捐出禮物就不得而知喇，但佢呢個做法認真惹人聯想。

查實黃成智一向都係白鴿黨嘅中堅分子，過去多年打正旗號搶議題、搶曝光嘅事迹都多不勝數，佢突然將白鴿黨嘅身份收埋，反搵建制派「科水」，莫非對劉慧卿做主席領導嘅白鴿黨冇信心，寧可自成一格為四年後重出江湖鋪路？

點講都好，黃成智家吓喺白鴿黨都唔可以話好如意，加上喪失咗議席，將更多精力用嚟發展自己嘅社工本業，或者係佢家吓無可奈何下嘅選擇啩。