拆東補西只為地 藥石亂投方寸亂

醫師甲：死嘞，死嘞，病人食藥無起色，針灸無反應，救唔救得番o架？

醫師乙：唔，情況好唔樂觀。咁啦，我呢度有劑寧神茶，你試試。

醫師甲：唔係啩，寧神茶可以醫急性貧血症？

醫師乙：劑茶係畀你飲嘅。你手騰腳震又手忙腳亂，病人唔死都畀你醫死啦！

咪以為純粹笑話，政府貴為房屋重症嘅黃綠醫師，手騰腳震之下係無可能醫得好本港嘅住屋頑疾㗎。嗱，佢哋最近開出一張新藥方，隨時又係藥石亂投。

話說，浸會大學一直爭取鄰近嘅前專業教育學院李惠利分校地皮，以解決宿位不足同興建中醫教學醫院嘅問題。本來呢，官老爺成日話發展教育產業，又話支持中醫藥發展，浸大呢個大計符合社會發展趨勢o架。點知當局突然向城規會建議，將地皮一拆為二，一半畀浸大，一半建住宅，就係咁搞出一場爭地風波。

面對政府呢個「留有餘地」方案，浸大梗係寸土必爭啦，批評官老爺將地皮興建豪宅根本唔符合社會需求，堅持保留全幅土地。一班浸大學生今日仲發起向特首梁振英請願行動添，擺出一副寸步不讓嘅姿態。

嗱嗱嗱，都話黃綠醫師手騰腳震好易出事㗎啦。即係咁，官老爺話發展教育產業，大家都知係吹水，不過你唔撥地支持大學發展都算，居然仲同大學爭地阻人發展，點講得通呀？更何況，大學宿舍長期供應不足，大學生都係另類住屋難題受害者吖，港府只為有錢一族建豪宅，懶理莘莘學子無宿舍容身，好滑稽啫，吓話！

開疆闢土無能，港府惟有拆東牆補西牆，亂爭亂搶。粉嶺皇后山地皮本來撥作興建私立大學，官老爺收齊標書之後至話打算撤回改建住宅。人無信不立，興辦大學朝令夕改話變就變，你估細路仔玩泥沙咩？唔搞到一鑊粥至奇啦。

唔止教育用地要搶，連啟德體育城都唔放過，結果喺體育界炮轟之下扯白旗投降。政府弱勢，動輒得咎，今次打浸大主意又係捉蟲o架咋！

所以話啫，家陣香港就似患咗土地貧血症，病到五顏六色毫無起色，房屋黃綠醫師束手無策，藥石亂投邊可能救得番？唔病多幾錢重都偷笑啦！

凡事都要對症下藥，官老爺要救住屋頑疾，同自己經脈錯亂嘅徵地部署把把脈先啦，叮！