SUN搞作：笑談普通話：人心回歸？把口都未回歸喎！

香港回歸偉大祖國咁多年，可惜唔少人個心完全未回歸，唔止個心，連把口都未回歸。成日開口埋口話要保衞廣東話，後果係咩？咪就係個個都唔識講普通話囉。唉，咁搞落去，我哋點樣同祖國接軌先得o架，又點樣融入祖國十三億人口吖？今日我哋就揀咗三位普通話講得唔好嘅名人，等大家從反面教材中學習！

第1位：古仔

無錯！講到笑談普通話，又點會少得「想節能，輪胎能」？嗱，根據小編估計，寫稿者係一個毒男，睇唔過眼男神可以「同樣的油量，卻比我走得更遠」，所以特登玩嘢。唉，your face your fate，算吧啦毒男！

第2位：曹超人

阿曹生一路用講唔正嘅廣東話當普通話，介紹自己有幾咁巴閉，搵錢又有幾容易，就咁成就咗一段神片。呢段片最偉大嘅地方，就係教識一班語文能力奇差嘅香港學生，喂，要搵到錢，使咩學好語文？

第3位：o架啡男神

o架啡男神之前憑住一首《年少無知》，成功登上唔少歌手夢想嘅頒獎台。係就係威到盡，可惜佢喺後台講嘅一番普通話，就搞到男神形象蕩然無存。不過睇在佢死頂講咗咁耐，同埋佢拍檔咁都忍到笑嘅份上，畀個第三位你算嘞！