SUN搞作：少膽虫手記：感謝讀者提供笑話

少膽虫手記自推出以來，得到各方嘅激讚同埋猜疑，搞到報界人人自危，實在非少膽虫本意。少膽虫原先只係想係呢度但求「三吓」就完事，亦即係賺吓外快，搵吓着數，同埋呃吓稿費嘅啫。勢估唔到大家唔單止想睇多啲《爛果》不為人知嘅內幕醜聞之餘，仲懷疑緊少膽虫本尊究竟係唔係《爛果》嘅老腫咁簡單，點解會知道淫賤黎咁多私人秘密呢？少膽虫唔直接答你，我用例子答你。

台灣壹全霉嘅報刊銷量大跌，經過正義傳媒報道之後，照計傳到開巷啦。但大公司不嬲都興欺上暪下、報喜不報憂呢一套，如果少膽虫唔咁樣做，反而係失職。於是少膽虫開會嗰陣，就口窒窒咁話台港壹全霉嘅報刊銷量全部大升，全靠淫賤黎領導有方、統一報業指日可待啦，點知淫賤黎一聲不響，立即黑面喎！少膽虫當時心諗：無理由o架，擦鞋喎，古人都有話，千穿萬穿……

「少膽虫！枉我當你係心腹，你竟然咁呃我！」淫賤黎咁樣大喝，簡直猶如張飛喝斷長板橋，又如長毛吹起一人集結號，少膽虫只感覺到體內的膽液四散流失，快要變做無膽虫。「台灣嘅蕭公子已經講晒我聽啦！」淫賤黎將手中無人要嘅《喪報》掟落嚟，散落一地。

「蕭公子？《喪報》嘅蕭公子？」少膽虫詫異非常，因為呢位蕭公子見工嗰陣自稱喺台灣旅行使晒錢先返嚟，相當兜踎；份人平時做唔到嘢乜濟，又成日懶型，但係因為人工夠低，請番嚟吸吓堆填區嘅衰氣咁嘅啫，點會估到佢可以直通天庭，做老細條針？

話音剛落，蕭公子企起身指住少膽虫話：「妖！戇居！少膽虫成日老作，你估依家係《爛果》做新聞咩？我哋銷量跌到仆直呀！」淫賤黎點點頭話：「好彩你係台灣返嚟同我講出真相，先至唔會畀呢啲奸臣蒙蔽！你哋要感激佢！」在座各位即刻拍手大嗌：「多謝蕭生！蕭生好嘢！」

少膽虫都算見慣大場面，靈機一觸話：「老細！我記憶中無講過大話，我係話《爛果》拎晒去焚化爐，燒量大升呀！哈哈！爛gag嚟o架，係唔係好好笑呢？哈哈！」