政壇：劉夢熊未獲公職似有微言

泛民主派議員尋日同城大聯合舉辦一個研討會，討論香港在一國兩制下嘅司法同政制發展，建制派悍將全國政協委員劉夢熊亦被邀出席，但係深入泛民陣地嘅劉夢熊，竟然真心貫徹「是其是，非其非」精神，佢喺特首選舉時全力支持CY梁振英，竟公然話CY班子「心理質素弱」、「兵來無將擋」，仲「苦諫」CY要正視社會政治化嘅氣氛，否則不但辜負咗中央、港人，仲只會淪為「匆匆過客」。

大家唔好以為劉夢熊為咗喺泛民地頭掙扎求存，先作出以上出位言論，事關會場外嘅佢口徑不變，重申自己支持CY義無反顧，但亦要直斥其非。

至於委任建仔劉江華做政制及內地事務局副局長算唔算用人唯親？佢話劉江華同CY唔算親，但「有啲明明唔夠班嘅人」被委入行會，仲接二連三出任公職，呢啲就叫用人唯親喇。

佢又強調自己無後悔支持CY，繼續力撐CY唔係靠批評對手僭建呃特首做喎。其實佢係咪覺得公職分配不公平呢？佢就話自己只係為國家同市民服務，「佢唔用我喺佢嘅損失！」然後一個轉身，走咗！