政壇：街坊like爆建仔登台獻藝

早前先講過，建仔會重返維園年宵，仲話食住蛇年大派蛇齋餅糉福袋，但原來咁都未夠o架，歌舞詩Rap甚至粉墨登場，可能令街坊睇得開心啲。

九龍婦女聯會尋晚搞咗個慈善夜，有成三百個公公婆婆參加，表演者唔係乜嘢天王巨星，而係班立會議員。建仔嘅「橄欖」陳鑑林率先打頭陣獻唱《大地恩情》，佢話首歌易唱又唔太長，幾乎係佢嘅飲歌，雖然有明顯走音，但台下好受落，仲籌到十一萬蚊。

李慧琼可能自知唱歌唔得，即席朗誦《愛蓮說》，悶就悶啲，但佢話象徵從政者出於污泥而不染，算佢過到骨啦。成晚最爆一定係蔣麗芸，佢以古裝打扮唱《梁山伯與祝英台》，唔唱得都睇得。佢一上台中氣十足，勁多公公婆婆like。本來應承上台Rap 「快樂西九」嘅梁美芬就臨時甩底。