政壇：兩局長敷衍辣慶議員

港鐵上周五派人落立法會鐵路事宜小組委員會，推銷喺南港島線（東段）引入無人駕駛系統，曾任九鐵主席嘅新民黨田北辰即時教官上身，以過來人經驗提醒港鐵，乘客遇上事故時會方寸大亂，有車長坐鎮就可以迅速協助疏散乘客，強調請車長嘅錢唔慳得。經歷過立法會選舉嘅洗禮確實唔同啲，識得照顧普羅市民嘅感受。

其實田二少除關注鐵路事務外，對特首CY梁振英嘅首份《施政報告》亦好着緊，上周四出席CY與議員嘅飯局時，更搶先向CY獻計。田二少透露，雖然CY當晚喺第四位議員提問時先履行競選承諾，拎出「一支筆、一本簿」抄筆記，但CY相當「心水清」，不但記得排喺第二位嘅田二少問過啲咩，更就每位議員嘅提問逐一回應，唔似得某啲局長回應議員質詢時「是是但但」！

政策搞到唔湯唔水

經我哋追問下，原來被田二少明嘲暗諷嘅局長，分別係教育局局長吳克儉同商務及經濟發展局局長蘇錦樑，佢批評兩位局長無論面對幾多位議員提出幾多條問題，一於變身「人肉錄音機」，有理冇理以「多謝你嘅意見」敷衍了事，一眾議員眼見每次嘅提問均石沉大海，都咪話唔嬲，唔怪得田二少直言「講完一大輪，都唔知佢聽到幾多」。咁咪同塞住對耳冇乜分別？

由兩位局長經手嘅政策大部分都「唔湯唔水」，好似吳克儉舊年就因為忽略市民感受，強推國民教育科惹公憤。至於由蘇錦樑揸旗嘅免費電視牌照更一拖就拖足三年。兩位局長一個鍾意先斬後奏，一個就採取拖字訣，又當議員嘅心聲冇到，唔怪得樣樣都搞到一鑊粥喇！