窮人貧病交困 富人健康快樂

開講有話，金錢唔係萬能，冇錢就萬萬不能。今時今日，冇錢何止寸步難行，直頭貧病交困！

唔係亂噏o架。港大一項調查發現，家庭快樂、健康、和睦程度與收入息息相關。即係話，收入愈高，家庭愈快樂、愈健康、愈和睦；相反，收入愈低嘅家庭，享用社會醫療服務嘅機會愈少，健康自然愈差。唔講唔知，家庭月入低於萬元者，平均有超過一種慢性病；而收入愈高嘅人士，連血壓都低啲。一句講晒，愈富愈健康，愈窮愈見鬼。

貧賤夫妻百事哀，基層家庭多病痛，調查結果可以話係意料中事。正所謂，人窮志短，窮人生活及工作壓力大，日日為口奔馳，血壓想唔高都幾難。香港自稱國際金融中心，政府坐擁天文數字嘅財政及外匯儲備，但扶貧就交晒白卷，搞到貧富懸殊不斷惡化，連獲得醫療服務嘅機會亦貧富有別，簡直係香港之恥，叮！

人人都有頭暈身慶嘅時候，唔同嘅係，有錢人有病隨時可以去睇私家醫生，唔使排隊，一流設備，優質服務，病都好得快啲喇。至於低收入家庭咯喎，唯一選擇係幫襯公立醫院，唔只服務質素差，仲要左等右等，冇病都等到有病喇。

講到公立醫院嘅服務質素，真係唔敢恭維，其他唔講，淨係睇輪候嗰條長龍咋，都令人怕怕喇。急症室閒閒哋等大半日，輪專科仲得人驚，隨時要等三五年，分分鐘小病變大病，大病變冇命。唔怪得前排有社福機構調查發現，基層家庭兒童今年其中一個新年願望，係有病唔使喺公立醫院排長龍，講起真係可悲。

窮人搵食難，睇病難，住屋難上加難，壓力想唔爆煲都幾難。據估計，全港兩成人口生活喺貧窮線下，即係每五個港人就有一個捱窮，港產官僚坐視貧窮問題不斷惡化而無動於衷，你話係咪冷血吖！

現屆政府口口聲聲「民生無小事」，講就好聽喇，但齋噏無謂，行動最實際，當務之急係撥亂反正，既要全力扶貧，亦要改善醫療服務。可惜吖，弱勢政府處處被動捱打，施政報告未發表已經舉白旗，事先張揚唔會派錢，扶貧誠意打晒折扣。講真，太一叮對呢份施政報告並不樂觀，如果到頭來又係吹水唔抹嘴，有姿勢冇實際，咁就該煨咯，叮！